<b>Cyfrol newydd yn cyfleu camau plentyndod</b><br />
Gyda’i glawr caled, dyluniad hardd, a’i gynnwys teimladwy, mae’r llyfr diweddaraf gan wasg Barddas yn cael ei ddisgrifio fel ‘y llyfr anrheg perffaith’.<br />
Casgliad arbennig o gerddi am blant a phlentyndod ydi <i>Wyneb y Bore Bach</i> sydd wedi ei olygu gan lenor a mam i bedwar ei hun, Haf Llewelyn o Lanuwchllyn.<br />
O glasuron fel ‘Bach ydi Baban’ gan Gwyn Thomas ac awdl ‘Gwythiennau’ Myrddin ap Dafydd i gerddi gan Sian Northey, Mari George ac Aneirin Karadog, mae’r gyfrol yn gyfuniad o’r hen a’r newydd.<br />
Rhan o gwpled o’r gerdd ‘Toriad Dydd’ gan John Hywyn yw’r teitl - <br />
Na! Ni welais anwylach
Nag wyneb y bore bach…<br />
Profiad cyffredin i nifer o rieni newydd, ond, meddai Haf: “Roeddwn i eisiau iddo fod yn fwy na llyfr i rhywun sy’n cael babi. Cofnod o gyfnodau mewn plentyndod, mewn barddoniaeth ydi o, cerddi yn dilyn bywyd plentyn o‘r funud mae’n cael ei greu i’r adeg mae’n gadael y nyth.<br />
“Rydw i yn 50 oed rŵan ac wedi bod trwy’r cyfnodau gwahanol hefo ‘mhlant, eu babandod hyd at orfod gollwng gafael pan maen nhw yn gadael cartre’. Ond nid dim ond cerddi am blant o safbwynt mam ydi’r casgliad. Mae plant wrth gwrs yr un mor bwysig i deidiau, neiniau a thadau ac mae’r cerddi yn adlewyrchu hynny.<br />
“Mae yma gerddi gan ddynion a merched, hen ac ifanc, cyfoes a hen gerddi.”<br />
Mae <i>Wyneb y Bore Bach</i>, a ddyluniwyd gan Olwen Fowler, wedi ei rannu yn bum rhan, o dan deitlau sy’n dyfynnu’r cerddi eu hunain. ‘Ynof fi, mi wn ei fod’, ‘Bach ydi baban’, ‘Maint fy myd oedd hyd y ddôl’, ‘Heno hed heb edrych nôl’ ac ‘Am mai rhan o’m rhieni’.<br />
Mae’r gwahanol rannau’n crisialu’r caleidosgop lliwgar o emosiynau ynghlwm wrth y gwahanol benodau o fywyd babanod a phlant, o’r eiliad y crëwyd bywyd, ee ‘Yn y Dechreuad’ gan Aneirin Karadog a’r ‘Dadeni’ gan Mererid Hopwood, i fabandod – ‘Fy Mab’ gan Meirion MacIntyre Huws, ‘Bach ydi Baban’ Gwyn Thomas, ‘I Blentyn’ David Hoskins a cherddi am blentyndod – ‘Crio’ gan Rhys Dafis, ‘Chwerthin Eban’ gan Annes Glyn a’r dirdynnol ‘Marwnad Sion’ gan Lewys Glyn Cothi.<br />
Mae’r profiad o weld plentyn yn dod i oed yn cael ei drafod gyda cherddi sy’n cynnwys ‘I’r Tinejyr’ gan Ceri Wyn Jones, ‘Allwedd’ gan Mari Lisa a ‘Croen’ gan Sian Northey, tra bo rhan olaf y gyfrol yn trafod y cwlwm rhwng plentyn a’i rieni gyda cherddi gan Gruffudd Antur, Tudur Dylan Jones ac Emyr Lewis yn eu plith.<br />
“Roedd yna rai cerddi roeddwn i eisiau eu cynnwys o’r dechrau – ‘Marwnad Siôn y Glyn’ yn un - mae honno yn gerdd eiconig a’r angerdd a’r ing ynddi mor amrwd rŵan ac yn y bymthegfed ganrif pryd yr ysgrifennwyd hi,” meddai Haf.<br />
“Ond fe ddaeth rhai wedi gwneud gwaith darllen ac ymchwilio, a rhai yn gerddi sydd wedi eu hysgrifennu yn arbennig ar gyfer y gyfrol. Mae yma gerddi annwyl a theimladwy, difrifol ac ysgafn ac rydw i wedi gwir fwynhau golygu’r casgliad. Tydi hi ddim yn gyfrol hir a’r gwaith anodd oedd dewis a dethol pa gerddi i’w cynnwys.”

- Cyhoeddwr: Cyhoeddiadau Barddas,